ኢራን፡ ኣብ’ቲ ዝሓለፈ ሰንበት ኣብ ዮርዳኖስ ኣብ ዝርከብ መዓስከር ሰራዊት ኣመሪካ ዝተፈጸመ ናይ ድሮን መጥቃዕቲ – ኢድ ከምዘይብላ ገሊጻ። እታ ሃገር ነዚ ዘፍለጠት፡ እቲ ህይወት ሰለስተ ወተሃደራት ኣመሪካ ዝለከመን ልዕሊ 30 ካልኦት ዘቝሰለን መጥቃዕቲ፡ ኢራን ብእትድግፎም ጥሩፋት ዕጡቓት ጉጅለታት ከምእተፈጸመ – ፕረዚደንት ኣመሪካ ጆ ባይደን ድሕሪ ምኽሳሱ እያ። ኣፈኛ ሚኒስትሪ ጉዳያት ወጻኢ ኢራን ናስር ካናኣኒ ትማሊ ሰኑይ ኣብ ዝሃቦ ሓበሬታ፡ እቲ ብኣመሪካ ዝቐርብ ዘሎ ክሲ መሰረት ዘይብሉ ሓሶት ምዃኑ ድሕሪ ምጥቃስ፡ እታ ሃገር ኣብ ሶርያን ዒራቕን እተካይዶ ዘላ ተደጋጋሚ መጥቃዕቲታትን፡ ኣብ ልዕሊ ቃዛ ዝፍጸም ዘሎ ህልቂትን ደው ክሳብ ዘይበለ፡ ኣብቲ ዞባ ዝርከቡ ወተሃደራታ ካብ መልሰ-መጥቃዕቲ ክድሕኑ ከምዘይክእሉ ኣገንዚቡ።
ነቲ ኣብ ማእከላይ ምብራቕ ኣብ ዝርከብ መዓስከራት ኣመሪካ ዝፍጸም ዘሎ ተደጋጋሚ መጥቃዕቲታት፡ እቶም ብኢራን ዝድገፉ ዕጡቓት ሓላፍነት ይወስድሉ ከምዘለዉ እዩ ዝሕበር። እዚ ከም’ዚ ኢሉ እንከሎ፡ ፕረዚደንት ጆ ባይደን፡ ነቲ ኣብ ጥቓ ዶብ ሶርያ ኣብ ዝርከብ መዓስከ ኣመሪካ ዝተፈጸመ መጥቃዕቲ፡ ወተሃደራዊ ግብረ-መልሲ ክህበሉ ምዃኑ ኣጠንቂቑ። ኲናት ቃዛ ኣብ ፈለማ ወርሒ ጥቅምቲ ካብ ዝውላዕ ንደሓር፡ ብኢራን ዝድገፉ ዕጡቓት ሚሊሻታት ኣብ ልዕሊ ኣብ ዒራቕን ሶርያን ዓስኪሮም ዝርከቡ ወተሃደራት ኣመሪካ 150 ግዜ መጥቃዕቲታት እኳ እንተፈጸሙ፡ እዚ ናይ ሰንበት መጥቃዕቲ – እቲ ዝለዓለ ሰባዊ ክሳራ ዘውረድሉ ፍጻሜ ኰይኑ ተመዝጊቡ ኣሎ – ብመሰረት ጸብጻባት። ብተወሳኺ፡ ኣብ ዮርዳኖስ ኣስታት 3 ሽሕ ወተሃደራት ኣመሪካ ዓስኪሮም ከምዝርከቡ፡ እቶም ጸብጻባት ይጠቕሱ።
